Халал дегеніміз – Алла Тағала рұқсат еткен, шариғатқа сай, адал әрі таза нәрсе. Халал (حلال) – араб тілінде рұқсат етілген, адал, заңды деген мағынаны білдіреді. Исламда «халал» сөзі тек тамаққа ғана емес, адам өмірінің барлық саласына қатысты қолданылады.
Харам дегеніміз – Алла Тағала қатаң түрде тыйым салған, шариғатқа қайшы нәрсе. Харам (حرام) – араб тілінде тыйым салынған, рұқсат етілмеген, заңсыз деген мағынаны білдіреді.
Құранда келген «халал» және «харам» туралы аяттар:
- Айт (уа, Мұхаммед): «Маған уахи етілгендерден тамақтанатын адамға харам етілген нәрсе таппаймын. Тек мынау ғана харам: өлексe (бауыздалмай өлген мал), аққан қан, доңыздың еті ол арам, және Алладан басқа біреудің атымен бауыздалған мал. Ал кім мәжбүр жағдайда қалса, қалауымен емес әрі шектен шықпай жесе, расында Раббың — Кешірімді, Мейірімді».
Әл-Әнғам сүресі, 145-аят (6:145)
- (Ей, мүміндер!) Алланың аты аталмаған нәрседен жемеңдер. Шынында, бұл – күнә.
Расында, шайтандар өз жақтастарына сендермен таласу үшін сыбырлайды. Ал егер оларға бойсұнсаңдар, сөзсіз, сендер мүшрик боласыңдар.
Әл-Әнғам сүресі, 121-аят (6:121)
- Ей, иман келтіргендер! Мас қылатын нәрселер, құмар ойындар, құрбандық тастары және бал ашу жебелері шайтанның істерінен болған арам нәрселер. Олардан аулақ болыңдар, бәлкім, құтыларсыңдар!
Әл-Мәида сүресі, 90-аят (5:90)
- Алла сендерге тек мыналарды харам етті: өлексені, қанды, доңыздың етін және Алладан басқа біреудің атымен бауыздалған малды. Ал кім мәжбүр жағдайда қалса, қалауымен емес әрі шектен шықпай жесе — оған күнә жоқ. Расында, Алла — Кешірімді, Мейірімді.
Әл-Бақара сүресі, 173-аят (2:173)
- Айт (уа, Мұхаммед): «Алланың Өз құлдарына берген көркем нәрселерін және таза ризықтарын кім харам етті?» Айт: «Олар бұл дүниеде иман келтіргендерге де (және өзгелерге де) арналған, ал Қиямет күні тек иман келтіргендерге ғана болады». Осылайша Біз аяттарды білетін қауым үшін егжей-тегжейлі түсіндіреміз.
Әл-Ағраф сүресі, 32-аят (7:32)
- Алланың сендерге берген ризықтарынан халал әрі таза болғанын жеңдер және Алланың нығметтеріне шүкіршілік етіңдер, егер шын мәнінде Оған ғана құлшылық етсеңдер.
Ән-Нахл сүресі, 114-аят (16:114)
